البحر بيضحك ليه…..و انا نازلة أتدلع أملى القلل؟!

البحر غضبان ما بيضحكش

أصل الحكاية ما تضحكش

البحر جرحه ما بيدبلش

و جرحنا و لا عمره….دبل

البحر بيضحك ليه…..و انا نازلة أتدلع أملى القلل؟!

مساكين بنضحك مالبلوة

زي الديوك و الروح حلوة

سارقاها مالسكين حموة

و لسة جوة القلب….أمل

البحر بيضحك ليه…..و انا نازلة أتدلع أملى القلل؟!

قللنا فخارها قناوي

بتقول حكاوي و غناوي

يا قلة الذل انا ناوي

ما اشرب و لو في المية….عسل

البحر بيضحك ليه…..و انا نازلة أتدلع أملى القلل؟!

ياما ملينا و ملينا

لغيرنا و عطشنا ساقينا

صابرين و بحر ما يروينا

شايلين بدال العلة….علل

البحر بيضحك ليه…..و انا نازلة أتدلع أملى القلل؟!

في بالي ياما و على بالي

اللي بيعشق ما يبالي

ما يهمنيش من عزّالي

يا حلوة….لو مرسالي….وصل

البحر بيضحك ليه…..و انا نازلة أتدلع أملى القلل؟!

بيني و بينك سور ورا سور

و انا لا مارد و لا عصفور

في ايدي عود قوَّال و جسور

و صبحت انا….في العشق….مثل

و البحر بيضحك ليه ليه ليه…..و انا نازلة أتدلع أملى القلل؟؟!!

البحر بيضحك ليه (للتنزيل)

كلمات: نجيب سرور

ألحان و غناء: الشيخ إمام عيسى

مش عارف أقول ايه و لا ايه، بحس إن فيه أغاني بتمسّني، و عبرت عن دة في أغاني كتير فاتت، أغنية بتمسّني في حاجة، في إحساس، في موقف، في لحظة، بس الأغنية دي مش بتمسّني و بس، دي هي أنا بشحمي و لحمي و طولي و عرضي و عمقي، و حسرتي، و شجني، هي أنا في صورة أغنية، هي إحساسي، تقريبا كل إحساسي!!!!! كل سطر فيها، كل حرف، كل رنة في اللحن، كل تنهيدة و كسرة في صوت الشيخ إمام، كل لقطة قوة، و كل لقطة ضعف، كل فكرة، و كل رمز، و كل قرار، كل بساطة اللحن و الكلمات، و كل عمقهم و تعقيدهم……..

كتير كنت بكتب عن نفسي من خلال الأغاني اللي مسّتني، المرة دي خايف، و مكسوف، لأن الأغنية دي فاضحاني على الآخر!!!!

معقولة! من عقود و سنين واحد حس كل الأحاسيس دي و عبر عنها بالجمال و العمق دة و آجي أنا بعد السنين دي كلها و أحس نفسي نسخة من الكلام دة؟! مع الفرق طبعا إن راجل عظيم زي نجيب سرور كتب الكلام دة عن مصر، بس أنا حاسسه عن نفسي بصورة شخصية أكتر،

أنا فعلا حاسس إني كدة، كتير بهزر و بضحك، بس من جوايا غضبان و غضبي بيغلي و بيحرقني و بيطرطش حمم عليا و ساعات على اللي حواليا، فعلا بضحك من البلوة، على حالي الشخصي و على حالنا كشعب تايه، ايه الضياع و الذل و قلة القيمة اللي احنا فيه دة!!!! ماحدش فاهم حاجة، و كله يا إما راكن على جنب و مش عارف يروح فين يا إما ماشي في الشمس بلا هدف و هيموت من العرق و بيسأل و بيحسس أو بيطبش على الطريق، و مع ذلك في وسط الزحمة و التوهان و الحر دة، فيه ناس واقفة بتملى قلل المية لغيرها عشان يستحملوا الطريق في الجو دة، بحس إني بيتطلب مني كدة، أو يمكن أنا اللي بحب أعمل كدة، بملى لغيري مية و احاول أرويله عطشه، أو شوية من عطشه، و أحاول أدلّه، مع إني يمكن أكتر واحد تايه، و عطشان، و تعبان، و معلول، و مجروح من جوايا، و جرحي عمره ما بيدبل، بس رغم كدة، ما بتأخرش عن حد برضه، و عمال أملى لغيري على قد ما بقدر، و على قد ما بفهم، و مستحمل و صابر،

و بالرغم إني ابتديت أتضايق جدا إن سكوتي و سوء طبعي بيخلوا قليلين قوي ياخدوا بالهم إن أنا كمان عطشان و عايز اللي يملالي، و يحاولو يملولي انا مية، و بالرغم إن دة ابتدا يفوق طاقتي، و بالرغم إن بحر ما يرويني، بس صابر برضه،

و برغم إني شايف قلة الذل متلقحة قصادي و بتتحايل عليا أشرب منها، بس برضه ناوي إن عمري ما هقربلها، حتى لو فيها عسل، و حتى لو هموت عطشان، يا اشرب مية نضيفة و كريمة و طاهرة يا اموت بعطشي و انا راضي.

بيني و بينك سور ورا سور……يا ترى أنا كدة بخاف من الحب و التعبير عن الحب؟ و لا بيني و بينه سور ورا سور؟

حاسس إن دايما فيه أسوار بيني و بين الحب، أسوار أنا اللي حاططها، بس ما بخافش من التعبير عنه لما تزول أسباب الأسوار دي، زي ما انا قررت ما اتكسفش و أعبر عن مشاعري دلوقت، لأني مش شايف المشاعر الحقيقية حاجة تخزي، بس إلى أن تزول أو تتغير أسباب أسواري دي، أنا ما احبش أنط من على السور و لا أكسره، لأن دة جزء من الذل اللي مش ناوي أخليه يرويني، الحب الغير مسئول؛

في مرحلة فاتت تصورت إني ممكن ألاقي البنت اللي في خيالي أو صورة قريبة منها و أحبها و أتجوزها! لقيت بنت قريبة جدا من الصورة، تقريبا هي، حسيت إني هلاقي باب السور و أعدي، ما اعرفش يا ترى دة كان إعجاب و لا كان حب، بس انا حاولت أحبها و ما عرفتش أحبها زي ما تصورت مع إني كان نفسي بجد أحبها و ارتبط بيها، حسيت إنها على موجة تانية غيري و ما عرفناش نلقط بعض، دة غير إني حسيتها بعيدة عني و أعلى مني و أحسن مني، و رقيقة على إنها تستحملني!!!!! حاجة كدة زي الجميلة و الوحش، بس غير القصة، أنا حسيت إني مش هطولها و ما تحقش ليا!!!!

يظهر الحب ما لهوش قاعدة، مش عارف أبرمجه زي ما نفسي أبرمج كل حياتي!!!! يمكن دة اللي قتل الحب؟؟!! هه، مجنون أنا!!!! أو يمكن الصورة اللي بقيس عليها كانت أصلا غلط؟! أو يمكن لسة فعلا مش جاهز لفكرة الارتباط؟ أو يمكن فكرت في واحدة ما تناسبنيش؟…….مش عارف…..بس اللي متأكد منه إن كوني متلخبط كدة و مش عارف كدة و مش واثق في مشاعري بالشكل دة، بالإضافة لظروف تانية و اعتبارات شخصية، كل دة معناه بالنسبة لي إني لسة مش جاهز للحب المسئول اللي في بالي، و إني كنت هأذيها جدا لو نطيت من على الأسوار دي ساعتها و انا مش فاهم مشاعري و نفسي، هي دي أسواري اللي حاططها لنفسي و اللي بتخليني أمنع نفسي أحب أو أبتدي أحب و أخبي دة، لأن الحب الغير مسئول دة قلة من ضمن قلل الذل اللي مش عايز أشرب من عسلها، إني أحب حب مولود معاه أسباب فشله، و أجرح، و أتجرح، و كتير بحس بالعجز و إني لسة مش قد القصة دي، ، عشان كدة أنا لسة حاسس إني مش عارف أشوف باب في السور، و لا عارف ابقى المارد اللي يكسر السور، و لا العصفور اللي يطير من فوقه، أو يمكن مش عايز……أو خايف……أو مستخبي ورا السور لحد أما أشوفلي حل…..

بس أنا زي الديك اللي رجليه لسة بتجري و هو مدبوح، الروح حلوة، و لسة جوة القلب أمل…….و لسة بحاول…..إني أغلب خوفي و ألاقي باب في السور و أخرج…….إن كان في الحب و لا في الحياة……أو أوصل لنقطة إني أحس إني خلاص لقيت الحل و عرفت سكتي و قادر أشيل و ما عدتش محتاج السور و ابقى المارد اللي يهدّه…..أو عصفور و أطير من فوقه!!!!!

مفيش غير إني أقول يا رب، يا مولاي، و أشد الرحال للطريق، و أرفع سيفي في وش نفسي و في وش الدنيا، لأن لسة المشوار طويل….

و اديني مسيري هشوف آخرة المشوار دة ايه…..بس دة ما يمنعش إن طول ما انا في السكة الأغنية لسة بترن في وجداني كله، يا ترى البحر بيضحك ليه و انا نازلة اتدلع املى القلل؟؟؟

البحر غضبان ما بيضحكش، أصل الحكاية ما تضحكش، البحر جرحه ما بيدبلش، و جرحنا و لا عمره دبل، مساكين بنضحك مالبلوة، زي الديوك و الروح حلوة، سارقاها مالسكين حموة، و لسة جوة القلب أمل، قللنا فخارها قناوي، بتقول حكاوي و غناوي، يا قلة الذل أنا ناوي ما اشرب و لو في المية عسل، ياما ملينا و ملينا، لغيرنا و عطشنا ساقينا، صابرين و بحر ما يروينا، شايلين بدال العلة علل، في بالي ياما و على بالي، اللي بيعشق ما يبالي، ما يهمنيش من عزالي، يا حلوة، لو مرسالي وصل، بيني و بينك سور ورا سور، و انا لا مارد و لا عصفور، في ايدي عود قوَّال و جسور، و صبحت انا في العشق……..مثل

و البحر بيضحك ليه….و انا نازلة اتدلع أملى القلل؟؟!!!!!

سامح حجاج

28/6/2008